Wed, 23 Oct 2019

Cebuano News: Siquijor hugot nanagang batok sa ASF

Philippine Information Agency
10 Oct 2019, 18:38 GMT+10

SIQUIJOR, Oct 5 (PIA)--Hugot nga gidid-an sa lalawigan sa Siquijor ang [pagpasulod sa] mga produkto nga baboy gikan sa pipila ka mga dapit isip panagang batok sa African Swine Fever (ASF), usa ka sakit nga nagdala ug dakong hulga sa industriya sa baboy.

Kini nunot sa Executive Order 2019-ZSV-2011 nga bag-o pa lamang gilagdaan ni Gobernador Zaldy S. Villa nga temporaryo'ng nagdili sulod sa usa ka gatos ka adlaw sa pagpasulod sa mga karneng baboy o mga produkto niini, hilaw o luto, lakip na ang mga "frozen boar semen."

Ingon man, temporaryo usab nga gidili ang pagpasulod sa probinsiya sa mga buhing baboy.

Sa pahibalo sa Provincial Veterinary Office (PVO) gilakbit ang hugot nga pagdili ang pagdala kon pagpasulod paingon sa Siquijor ang mga mosunod: buhi nga baboy gikan sa tanang dapit sa Luzon, tanang matang sa karne sa baboy luto o hilaw nga gikan sa Luzon, imported meat ug processed meat gikan sa Luzon ug gikan sa mga mosunod nga mga nasud sa Latvia, Poland, Romania, Russia, Ukraine, China.

Ang mga buhi nga baboy, karne sa baboy (luto o hilaw), processed meat o ubang produkto nga hinimo sa baboy nga gikan sa ubang bahin sa Visayas ug Mindanao tugotan nga makasulod sa Siquijor kon may dala nga shipping permit, livestock handlers certificate, farm accreditation gikan sa Bureau of Animal Industry (BAI) ug alang sa karne, kinahanglan ug certificate of inspection gikan sa National Meat Inspection Service.

Kalabot niini, gihangyo ni Dr. Bernardita S. Tabada, hepe sa PVO-Siquijor, ang publiko sa pagkooperar pinaagi sa paglikay una pagdala og mga buhing baboy, karne ug ubang pang mga produkto niini ilabi na kay miabot na ang maong sakit sa Luzon.

Sumala pa ni Tabada, bisan ngani ang mga frozen meat gikan sa Germany, angay gayud nga bantayan tungod kay uban niini nagagikan sa Poland ug gimarkahan lamang nga gikan si Germany pero tinuoray gi-"tranship" lamang sa maong lugar.

Among gihangyo ang publiko sa paglikay pagdala ug mga "frozen meats" ug uban pang "pork-related products" labi na gikan sa ASF-infected places," sumala pa ni Tabada. (rac/PIA7-Siquijor)

More Germany News

Access More

Sign up for Germany News

a daily newsletter full of things to discuss over drinks.and the great thing is that it's on the house!